 Anima divina |
| ANIMA DIVINA Quandi l’aria piaghjinca ni voli cunfidaci i so lagna Chi u mari furiosu cunvoddi a so anima pagna U turmentu ruzzica l’onori di a muntagna ribedda Ma ancu quandu u to celi abbughja ni se tu a piu bedda Quandi a macchja infialzata accodi l’ultima piuvicinata Chi u soli sgranatu ci sponi tutti i so splendori Mancu a timpesta cotra u to sangu mai un se arruvinata Cursichedda tu se a billezza e pussedi ugni ardori Quandi u focu impazzitu surraca i cuntorni di a sarra Chi tu dumandi aiutu e chi nimu ti credi a veru Tandu u vicu sigretu si perdi a mezzu a l’addisperu Maladettu sia l’inumanu chi speda a to tarra Quandi a piscia si lampa amurosa in ugni ghjacaronu Chi u ventu abbiuccia a furesta e a notti culmina Quandi i steddi so tanti paesa l’anima sfrationu Curona u to visu fideli e se bedda e divina CUNOSCI Cunosci u cori di u paesi scunsulatu Chi campa stuvu quandu fala a notti E u sunghjuzzu di a funtana Induva a siti d’amori bii culori di a sera Cunosci l’ora franca di i mattutini L’odori di l’ombra di a tarra quand’iddu piovi A voci fida di l’arghjaghjolu in festa Eppò u cantu tristu chì siduci a to pena Cunosci u lumu di l’ultima battaglia E quiddi steddi cechi di miseria O l’acedduciu sviatu sopra mari E pò i vechji ghjorna carchi di mistera Cunoscu eiu u nomu sminticatu E u puema sempri missu à u scartu U solcu apartu di a noscia strada Dù sola una cruci un ghjornu s’hè firmata I STANTARI Stantari di Filitosa Misteriosi fieri e muti Qual’e chi pò dì qualcosa Dà duva seti vinuti Vò di razza maestosa Da a stoddia scunisciuti Qual’sarà chi v’a zuccatu Senza punta ne marteddu A a lucci di u soli Di a luna o di i steddi Qual’sarà l’essaru stranu Chi v’a fatu cusì beddi? Qual’sarà chi v’a piantatu Un’ ad un infilarati In quissu campu vardatu I seculi seti stati Mà nimu v’a dumandatu Da duva erati scalati ! Seti fiddoli di Gramanti Scappati da u fumaccia O populu di livanti Fattu pà guerra e pà caccia? Forza seti i giganti Dundi sé persu a traccia Seti di u tempu andati I tistimogni sacrati Quiddi ci ani lacatu Di i vechji i cuntati Ed e quì in quissu pratu Chi vò ni seti campati! Mà di vò ghjuveddi cari Nò un’avemu paura Chi seti i corsi antichi Nati in tempu di bughjura E dà nò sareti amati Fin’a chi ssu mondu dura! FORA DI Fora di u mondu falzu indù si compri è si vendi Fora di u mali oscuru chì affanna a menti Fora di i porti chjusi indù si taci a pena Fora di tutta l’ultranza è ch’invadisci l’avveni Si sparghji u culori di l’anima di una vita Nivulosa, imposta da a prima alba Si sparghji u raghju sanu d’un sognu curaghjosu Chì stà fermu un mumentu in l’eternu… For’di l’idea svanita e di u mumentu maestosu For’di l’ora di u tempu e di l’uffesa inbiancata Fora di l’acqua sacrata chì pardona à ungni fedi Fora di a to scurdata pà tutti li vechji pinseri Si sparghji u culori di l’anima di una vita Nivulosa, imposta da a prima alba Si sparghji u raghju sanu d’un sognu curaghjosu Chì stà fermu un mumentu in l’eternu Fora di quiddi cateni ch’impediscini a spiranza Fora da a vera manera pà sviutà i vosci veni Fora di u cantu scemu vagabondu di a notti Fora di l’anticu chjassu è di a to stedda oghji persa Si sparghji u culori di l’anima d’una vita Nivulosa, imposta da a prima alba Si sparghji u raghju sanu d’un sognu curaghjosu Chì stà fermu un mumentu in l’eternu U SPIDALI Scuddu d’arghjentu finu postu a meza virdura Eternu vardianu di a piaghja serena Òpara d’omu mischia a quidda di a natura Balconu sbalasgiatu supr’a u mari di Tirena! Dopu a l’alza di l’alba u soli ti saluta Pò pianu s’avvicina ti scopri ‘cu dulcezza Scalda di u so basgiu a machja pampanuta Chi anc’idda si svighja e brama a so carezza! Pà unurà l’invitu sparghj a to furesta Di larici di pina di filetta e di nocca L’arbitru e a scoppa facini sempri festa A quiddu chi biatu va versu l’Alta-Rocca! Insiddatu a a teghja l’anticu miridianu Porghj l’ora chi passa senza nisciun prighera E quandu u soli stancu si chjna pianu pianu S’addurmenta anc’iddu stancu a a so manera! Si tacci cu a notti a risa di i ziteddi In celi steddi d’oru sò quì cussì vicinu Sò simuli accesi a tanti fiaculeddi Appicati un ad’una in cimma d’ungni pinu! Cosi di U Spidali strinti in a currintina Dà u Pinu di u Curatu fin’a u Pinu Tortu Locu caru e sacratu di a me zitiddina Ricordu chi pà me un sarà mai mortu ! ETERNA FRATIDDANZA Tu chi ni stà luntanu Cu lu me cantu voddu essa acantu a te Porghj i mani cusì insemu saremu bè Pà l’avvena Eu ti piattaraghju Cu una ripoghju fatu di renu e ventu E l’ariloghju mai più un fughjarà lu tempu A l’eternu Tandu supra i mari Faremu un ponti nati di milli fiori E l’amicizia trà nò diventarà amori Pà l’avvena Vò altri sempri soli U cori strintu e carcu d’amarezza L’affanu vintu ‘cu noscu scaccieti a tristezza A l’eternu E da i steddi incesi Piuvirà acqua inzucarata e in oru Sta mani santa in i casi sparghjereti u calori Pà l’avvena In ssu celi fratternu Puru e sinceru cume a u primu albori Menti intricciati e fati suminaran’ amori A l’eternu U RUSULAGHJU Un ghjornu un rusulaghju in circa di ben fà Si missi à buttà à l’anghju d’una porta Stanghittata dapoi qualchi annata fà Ma iddu si dicia di quissa ùn m’importa Parchì u rusulaghju tinìa in u so cori Un sicretu maiori cù monda ghjilusia Bramaia à un bel’ghjornu di fà li grand’onori A l’omu chì sicura indè se vultaria È cusì tutti l’anni à u mesi di maghju Si vistia di fiora u beddu rusulaghju Si vistia di fiora u beddu rusulaghju Ora u tempu passaia è a porta staia chjusa È avali più nimu da l’usciu s’accurtaia Ma pà u rusulaghju era una bedda scusa Chì u tempu passendu più beddu duvintaia Li paria dighjà di senta da luntanu U passu di quidd’omu ch’ùn avia mai vistu Ùn’era rivultatu u tempu di u branu Tuttu ni rinascìa dopu à l’inguernu tristu E com’è di l’altr’anni à u mesi di maghju Ni sparghjìa u so muscu u caru rusulaghju Ni sparghjìa u so muscu u caru rusulaghju L’inguirnacciu crudeli cù tutti i so macagni Di a tinta casaredda ùn ebbi più primura Senza manc’ascultà, ne suspiri ne lagni Ni ghjunsi à sfraià li li so povari mura À mesi à legna merzu è petra accatastata Com’è una varghja viva a porta firmò ritta In ‘ssu marì pietosa cun l’avìa tuccata È a so sarratura si n’era stata zitta È pà idd’oramai chì lu teni abbracciatu Più beddu rusulaghju fiurisci à l’abbranata Più beddu rusulaghju fiurisci à l’abbranata U Pettirussu Pienghji u Pettirussu Nant’a l’alivi di spiranza e pienghji sempri Bramma u sò amori Chi com’un ghjornu s’hè pisatu in u me cori O Pettirussu un ti n’andà sogu cun tè E pà l’avvena friscia dinò ‘ssa riturnella Cresci nantu a i monti A noscia chjama a l’infinitu si ne và Vivi supra ‘ssu mondu A noscia voci di cridenza ribumbarà O Pettirussu un ti n’andà vogu cun tè E pà l’avvena cantemu bè ‘ssa riturnella Corri sempri pà idda Chi comu a luna pà u soli s’he scitata Canti sempri pà idda Chi comu l’omu pà a tarra si ne vultatu O Pettirussu un ti n’andà stemu cun tè Ma pà l’avvena cantemu bè ‘ssa riturnella L’ORIU DI CHERA Ni vidi spuntà u ghjornu Da livanti a la marina E pari chi tu fighjoli Quandu varca a Roccapina L’oriu di Culioli Espostu nantu a culina Espostu a l’acqua e lu ventu Firma sempri sintinedda Vidi li monti di tempiu E navigà li batedda Vidi a Cagna ugni mumenta Vidi Asinao e Bavedda Un arburu siculari Chi li servi pa iscala Quandu eramu sculari Facciamu u codda e fala Avàl’ codda a chi li pari Ghjeu, mai più pinsalu ORTU D’AMORI O quanti spassighjati in ssi violi fiuriti Chi u tempu amurciatu un n’a mai svanitu Primu amori prima punghjtura Prima tristezza di a vita In i so ochja fiuriti c’era milli culora C’era a tarra infiniti e u dulci calori D’un veru ortu d’amori D’un veru ortu d’amori A u branu di a vita prima strinta di cori Pocu a pocu e vanita pà un lascia in cori In quissu ortu d’amori In quissu ortu d’amori O quanti spassighjati in ssi violi fiuriti Mani e cori accupiati a l’appiatu di i litti Primu amori prima punghjtura Prima tristezza di a vita E ssi prumessi amati urnati di fervori Si ni so sfilacciati cume ungni primu amori Natu troppu a bon’ora Natu troppu a bon’ora E pò semu partiti e cadutu lu fiori Mà in ssi tarra infiniti si ferma lu saporu D’un veru ortu d’amori D’un veru ortu d’amori Si ferma lu saporu D’un veru ortu d’amori D’un veru ortu d’amori TANTI GHJENTI Alzaiani lu pugnu Tanti ghjenti d’ugni età E tali l’api in u bungnu Ochji di a vulintà Cù l’idea cumuna Chi ni faccia trimà I ghjenti senza furtuna In circha di parità Alzaiani lu pugnu Senza mai dubità Chi l’ideali pungni L’omu chi voli guvarnà E l’idea cumuna Chi facci sempri trimà E a sola furtuna Chi ni pudarà firmà A cretu a lu duveru Omu fattu d’unestità Mà s’altri incù manera Cun arguzia e vanità Ani criatu u so imperu E a so muralità Chi t’impara a essa fieru Postu chi tu pò campà Chi t’impara a essa fieru Postu chi tu pò campà Alziani lu pugnu… |