 Naturale |
| Aostu L’ansciu caldu di a tarra azzeca a cardiccia Purtendu si e voce di e tribbiere antiche È l’aghja intornu à quale maturavanu e spiche Dorme nu u so lettu di filetta russiccia È dorme a mio tarra chì sulleone asseta Sò l’ultimi vardiani lamaghjone è vitalba Ad alzà capparoni per mantene la salva Ad aspittà l’acquata chì a vita disceta Ma subitu u celu s’ammanteghja à l’intornu ´ssu lume chì accicava in un frombu si spegne Aostu si ritene eppoi mette à piegne È mancu un si sà più s’ell’hè notte o ghjornu U fiume eri asgiatu fala più furiosu È mi pare di sente qualchì stranu lamentu U fiatu di un mulinu ch´omu cridia spentu Macina torna l’ore in versu laziosu. Un altru mondu Quì sò nate à millaie e billezze infinite Quì canta l’armunia di e voce addunite È ognunu s’impreme di e più ghjuste lite Quì sò i vardiani di e cose sicrete Quì sò i fiumi scemi è e funtane chiete È ognunu ci stancia e so prufonde sete Quì và la vita Pare infinita Quì và la vita Infinita Quì e stagione sò cum´è quattru viaghji Quì u sole cumpone canti cù i so raghji È ognunu sà sente tutti i so missaghji Quì u tempu hè ligeru, l’ore sò fatalelle Quì a notte s’accende à u focu di e stelle È ognunu ci campa e stonde e più belle Quì và la vita Pare infinita Quì và la vita Infinita Quì ci sò l’emuzione, e passione palese Quì i sguardi sò chjari è e mani sò tese È ognunu di l’altri ne piglia e pratese Quì si ne và lu ghjornu abbracciendu a sarra Quì l’acquatu carezza è prufuma a terra È in core d’ognunu ci brusgia una fiara Quì và la vita Pare infinita Quì và la vita Infinita… Universale E mio cunfine Sò sponde inturniate D’onde turchine Fole è sunniate… È u ghjornu sbuccime Ci sparghje e so ale, Sentu l’universale. Una furtezza Chjerchju di a mio ghjente, Un aghja tralucente, Nidu dulcezza, Ci nascenu e rime À parolle nustrale Scrivu l’universale. E mio cunfine Sò di rena è di mare, Voce latine, Manduline è ghitare Eternu sussurime Di versu naturale, Cantu l’universale. Una furtezza Un reame di vita, Muntagna intimurita, Fonte purezza, Muvra di l’alte cime Ritta nant´à u sciappale, Temu l’universale. E mio cunfine Sò bracce spalancate, Albe marine Date à e cavallate È à mezu spulime, Di lacrime è di sale, Campu l’universale. Una furtezza In brama d’orizonti Un armata di monti, Isula altezza, Necu l’assugittime À lege culuniale Sfidu l’universale. Di rime sciolte Scrive ghjorni, notte è stagione Luce o bughjicone Dì l’umbrie o puru e sulane Friscure o caldane Fà canzone d’ogni stundarella Tinta d’oru o ancu mischinella Scrive l’ore passate o à vene À rime serene Scrive, cantà, dì In puesia cusì… Piaghje, monti è fureste prufonde Stelle è luna bionde Celu, mare è immensi rinaghji Sole di mille raghji Fà canzone d’ogni paisaghju Culuritu à dicembre o à maghju Scrive l’ore bianche o verdicante Di rime tamante Scrive, cantà, dì In puesia cusì… Rise, surrisi è carezze sincere Alma è mente ligere Zerga, brioni è core à timpurale Missoghju fatale Fà canzone d’ogni gestu umanu Un cuntrastu, una strinta di manu Scrive l’ore di Pace o rivolta D’una rima sciolta. Scrive, cantà, dì In puesia cusì… Sant’Alesiu In core à e sulane Ci hà postu u supranu E credenze arcane Ch´innalzanu l’umanu Da Rusiu è e caldane À l’aghje di Sermanu D’un passu indiatu Versu l’antica fonte L’omu s’hè attippatu Fighjendu à l’orizonte Issu tempiu innalpellatu In cima di u monte Laudate Sant´Alesiu Magia o incantu U tempu s’hè firmatu Cum’è un ritattu nantu I muri incalcatu L’estru di Ghjuvan Santu Petru Francescu à u latu S’innalza da l’altare U « gloria » sulenne Colla versu e sarre Ribomba à voce piene Cantu di e fiumare Chì corre in le mio vene Paghjelle inariulate Chjamate senza fine Quelle voce andate Versu d’altre cunfine Di granu suminate Trà e valle turchine Laudate Sant´Alesiu Natura U celu tesse un linzolu di seta, Candilleghja l’acquatu nant´à l’arba, Ind’è e valle spirieghja l’alba ; Natura surriente si disceta… U sole sparghje u so primu ragiu, Maistosu trapaneghja a sarra, Strisce d’oru chì avvampanu a terra ; Natura riceve u primu basgiu. Un vintulellu colmu di dulcezza Alliscia e virdicante culline Fendu trimà e fronde castagnine, Natura gode a prima carezza. Armunia chjamata Natura, Degna d’esse ludata da tutti, Natura. U virani imbalsama a muntagna, Sott’à i largi in la furesta ascosu, Muvrella saltichjeghja graziosa. Natura à sole altu l’accumpagna. Spampilluleghja l’acqua luminosa Di una surgintella cantarina, Senti a so vucetta cristallina ! Canta per tè natura generosa ! U sole d’oru in mare si trapenta Abbraccendu u ghjornu chì smarisce, A sarra a l’attrachjata s’imbrunisce, Natura assirinata s’addurmenta… Armunia chjamata Natura, Degna d’esse ludata da tutti, Natura. Trà muntagna è marina Trà muntagna è marina ci aghju e mio passione Millaie di maraviglie è sulane di canzone Ci aghju immensi silenzii, malincunia dinù È i chjassi muntagnoli chì si ne vanu à l’insù Muraglioni testimonii d’un passatu gluriosu Tagliati indu a sciappa arritta è spavintosa Ci aghju un mondu di purezza, di serenu è po d’asgiu U cantu di e surgente è di u ventu u basgiu I machjoni lucicanti timparati d’umbulina È e cavallate sceme di l’immensità turchina Ci aghju l’ansciu trascaldatu di l’estate infiarate Inguerni di neve bianchi pè e sarre insannicciate Un’ emuzione prufonda à u sbuccià di u ghjornu O un timore sicretu quand´hè bughju à l’intornu Ci aghju l’occhji di i mei per fighjà eri è dumane Un ortu di puesia è i chjosi posti à granu Ci aghju tutta a mio vita è forse ancu l’amore Ci aghju tante è tante cose per u sempre in u mio core… L’infame siere N’un tempu ch’ùn hè più, figliolu t’arricordi ? Solu era di biade l’oru di e mio stese Campavanu à u sole tutti i nostri accordi È solu di u ventu ne patia l’offese N’aghju vistu stagione, accoltu impiaghjere Ribombanu ancu avà i so tintinnulimi N’aghju ascosu fiurimi, maturatu cugliere È datu per prufittu centu mila vaghjimi In core l’aghju sempre à millaie e spere Cum’è tanti virani è tant’altre lucende Ùn vogliu per mè e to infame siere Eiu ch’ùn sò di nimu, eiu ch’ùn sò à vende Per u tempu da fà, figliolu s’è tù senti U vularia gode sempre à alma sirena Ùn pate altri assalti cà quelli di li venti Vinuti à alliscià vitrusellu è cianfena Sunnieghju un aratu turnatu à carizzammi Bramu per a mio pelle quelle dolce ferite ´ssi solchi à suminà da chì torna mi chjami Tarra, è invintà pascure infinite In core l’aghju sempre à millaie e spere Cum’è tanti virani è tant’altre lucende Ùn vogliu per mè e to infame siere Eiu ch’ùn sò di nimu, eiu ch’ùn sò à vende Trè voce Una voce è un’antra è un’antra è u cantu Chì ci piglia è ci ammanta è ci porta à l’incantu Cum’un fiume trascina, da azzicà u mare, L’imbuleghju di rime arrubatu à e sarre Sei filari à tesse di seta puesia Da veste u silenziu à robbe d’armunia È versi savuriti per daccile à sente Quelle voce mimorie intinte d’oriente Trè voce intricciate À e stonde landane Eppuru arradicate À l’ore di dumane Una voce è un’antra è un’antra è u cantu Chì ci piglia è ci porta à viaghju tamantu Cum’è muse chì vanu appese à u ventu Da fà nasce sistine una volta eppo centu Di siconda è di bassu è di terza addunite Per cuntacci l’amori, l’esiliu o e lite E ferite, e gioie cù u più fine arte È dà vita è ribombu à ogni cosa à sparte Trè voce intricciate À e stonde landane Eppuru arradicate À l’ore di dumane L’utimu ghjornu Si tacenu li fiumi in core di l’arestu È à machja à l’intornu more dissuchjulata In fondu à u desertu brusgia una vampata Suminendu sciagure malanni è bisestu Sò lacrime amare sottu i sulleoni Da a fame chì rode i scheletri sbandati Ma quale hè chì n’hà cura di issi malavviati ? Ùn ci vole à scumove i tratechji ricconi ! Issu mondu d’uni pochi ch´ammansa i prufitti Calcichendu ogni ghjornu a miseria spugliata L’aboccu di u soldu a corsa indiavulata Da impistà i mari è i nivaghji infitti. Ma venerà issu ghjornu di collera feroce Allora celu è terra tandu s’appaghjeranu Scatenerà i venti, i monti è l’oceanu Quellu ch´insanguinò u legnu di a croce. Cavallu corsu Sì u cumpagnu fidatu Ch´eiu cavalcu cun piacè Nant´à l’andatu tracciatu Da i strazii è da e spere Opera di l’antenatu Di tante faccende fiere Per issi chjassi petricosi O sta teppa a più dura Assulanati o ascosi Cum´una più bella fiura I to passi generosi Ne piglianu a misura Pè u Borgu o e custere in d’altre occasioni À mezu à lagni è preghere O furori di cannoni Sottu à e fiere bandere Ùn temie paragoni In muntagna o maraviglia Senza teme a stagione Chjoma sciolta è senza briglia In Tenda o u Cuscione Sempre à tutti faci inviglia Cum’è u fieru San Petrone Quandu a manu di l’omu T’hà messu à a servitù Di libertà ere colmu Forse ti ricordi tù Mancu u frescu di l’olmu Ti pò rende sta virtù Faccia à stu razzinu schiettu Mi tanaglia u rimorsu È vulinteri l’accettu D’allocierisce u morsu In segnu di gran rispettu U mio cavallucciu corsu À PASSU LENTU O BRIGLIA SCIOLTA CUM`È U VENTU ELLU MI PORTA |