 Blues di paese |
| MAI À TUMBÀ In quella scola di Parigi Ci riscuntraimu eo è tù Scalendu di le nostre isule A toia in ghjò, a meia in sù In camera tutte le notte à rumbu biancu è à caffè Barattavamu le nostre isule A toia à mè a meia à tè. Ripigliu : Nò, mai à tumbà U ricordu, u ricordu Nò, mai à tumbà U ricordu di quell’età. Dicie :” in què u paese Ma chì simu venuti à fà Quindi ci crescenu l’offese Ma u bisognu ci fece stà . “ Soga era listessu battellu Chì tremindui ci pigliò Cum’è la luce chjappa l’acellu Per un pugnu di baiuccò. Tandu ci mancava lu sole I so pezzi i sapie piattà In lu focu di un piverone In la to gioia di ballà è scaccanave quand’eo dicia Chì ghjere lu moru per mè. È u pudere di la risa L’aghju amparatu accantu à tè. È l’acque chjare di u to lagone L’aghju intese tantu ammentà Eo Carbunaccia è Vilone Ghjera sempre prontu à vantà Ma s’ella c’hè una cosa vera In quellu tempu chì ùn hè più Un pezzone di la mio terra Lu m’ai fattu scopre tù. EO È TÙ Eo è tù feremu un omu Un omu novu eo è tù Piglia terra, legnu è calcina Appronta i to ferri dinù. U to sangue u truveremu U truveremu eo è tù Chì corre in tutte le vene Di la furiosa ghjuventù. Di lume incenderemu u sguardu L’incenderemu eo è tù Da sdradicà fame è miseria è tante è tante schjavitù. In la so manu metteremu Ci metteremu eo è tù Mazzulu di fiori ribelli Da fà cresce ogni virtù. A so pelle a tinghjeremu A tinghjeremu eo è tù Di culore di mille stelle Rossu, neru è giallu dinù. In la so bocca pianteremu Ci pianteremu eo è tù U cantu di la lotta eterna U cunniscimu eo è tù. In lu so core piatteremu Ci piatteremu eo è tù Una sete di gloria à vene Per li spluttati più ch’è più. Nantu à la spalla li poneremu Li poneremu eo è tù Culomba bianca la più bella Da cincinà e stelle quassù. Tù chì mi senti in la bughjura À bughju simu eo è tù S’ellu ti piace issu mondu novu U ci feremu eo è tù. Tù chì mi senti in la bughjura À bughju simu eo è tù S’ellu ti piace issu omu novu U ci feremu eo è tù. CUME HÈ Ripigliu : Cume hè chì u penseru mi rode Cume hè chi quandu ùn ci hè più sole Cume hè chì le to case sò chjose A ghjente si ne và, so belli pochi à fermà Cume hè chì a vita ùn mi vole Cume hè chì mi cundannanu à more S’ella avessi da durà què, allora hè finita A storia per mè. Assai ne sà Quellu chi ùn vole mancu sente U lamentu di a surgente Chì ùn hà orte da innacquà. Mi mettu à sunnià è mi cunfondu incù le stelle Ramentendu e stonde belle è lu piacè di campà quì. Vulerebbe dì à lu focu è à lu ventu Quant’ellu hè neru u turmentu Chì nasce è chì cresce quì. È pudè capì Di li mio balconi, li fiori Chì perdenu li so culori Videndu a natura smarì. U CASTAGNU INNAMURATU O cusì bella donna venuta à ripusà Nuda sottu à le mio fronde In la mio ombra pagna era dolce à carezzà è s’hè intesa rinfrescà. Fù cusì chì l’amore entrò In lu mio suchju di poveru castagnò è per dì la so maestà L’acelli tutti si sò messi à chjuchjulà. Hè la dea di l’amore È cun ella la mio vita vogliu fà S’ella ùn passa la fiamma Li vogliu fà onore è ben vestutu mi truverà. U sole ch’impiumbava a purtava versu mè è li so ricunniscente In lu scuchju sentia a so pelle trizinà è lu so core pichjà. Tengu à dì chì stu tempu fù Una delizia di passione è di virtù Ma si sà tuttu hè per finì Intenneriti vissemu l’estate smarì. Maraviglia ella si chjama Chì à la vita un sensu sà dà Di la so cumpagnia N’aghju sempre la brama Ma sò chì un ghjornu rivenerà. Avà soffia u friscone prontu à tuttu ruvinà D’oru si carca a natura Mentre chì lu mio pannu fronda à fronda si ne và U vestitone metterà. Eo quì cundannatu à stà L’inguernu sanu insischitu à aspettà Da culà pò solu mandà I mille basgi chì lu ventu sà purtà. Ma à tempu à lu veranu U mio custume novu, degnu d’ella, sbuccerà Per pudella aggruttà Le branche sparghjeraghju è l’incantesimu turnerà. U PRIMU DI SETTEMBRE U sole d’estatina ùn si ne vole andà È tuttu lu cuntornu ellu face cantà Si sente filetta, menta è finochju Sopra la piaghja, splendida, corre l’ochju Radica è ceppu ! Amici è parenti Sò à cannella strinta è stringhjenu li denti È si cerca à capì ciò ch’ùn hè da capì Pocu vale à pensà, forse menu ancu à dì. È u vechju dicia : tuccava à mè Quessa ùn hè micca ghjusta è ùn si sà perchè Ùn ci hè più nè tempi nè ore Di a nepita esce forte l’odore Bonu, callu, prufondu è paisanu Chì copre u paese è tuttu lu suttanu È si cerca à capì ciò ch’ùn hè da capì Ma ùn vale à pensà, forse menu ancu à dì. Cum’ella hè accaduta ognunu vole sapè Si volta è si gira ma ùn basta à vulè E petre di li muri ci guardanu passà Sò testimoni muti à fin’di ramentà Nantu à lu scalone, di una casa chjosa Un gattu russicciu misteriosu posa È si cerca à capì ciò ch’ùn hè da capì Pocu vale à pensà, forse menu ancu à dì. Turnata nant’à locu a ghjente si ne stà Ognunu s’avvicina ma ùn sà più parlà Quant’è u mai più hè grande dulore Ma per dà capu ci hè lu nostru amore U sempre di lu core ne face d’argumentu U viotu ùn pò nunda contr’à u sentimentu È si cerca à capì ciò ch’ùn hè da capì Pocu vale à pensà, forse menu ancu à dì Ciò ch’ùn hè da capì ùn ci vole à circà Ma pocu vale à dì, forse mancu à pensà. ERAMU IN CAMPU Eramu in campu Dì l’amore gradito Duve fra iI fiori Circava più bello. Eo sentava Un falso grido E mi sembrava Che fussi un ocello. Io guardai Da duve vinia E vidi fra i fiori Dormire una dea. Allor’ mi accostai Col pie vacilente Timido al cuore La voce tremente. Sappiate o bella Che son’ cacciatore Che gli ocelli Fogitti li prendo. Porto lo schioppo Lo fischio e la rete E prendo l’ocelli Mia bella credete. Posto che voi L’ocelli prendeti Potreste assanare Le mie ferite. D’OGNI SORTE Di l’edee ne hè pienu lu mondu Tutte zuffe di mille virtù Certe ci portanu à lu sprufondu D’altre tiranu à l’insù Attuali o à l’anticogna Mille danni elle ponu fà Chì d’ogni sorte sì l’edee sò Ma una hè mea è l’altre nò. E ragioni vanu à cullane Per spiecacci a realità Sò cum’è chjerchji senza liame Chì ùn ponu più chè cincinà Ciatte ciatte cum’è la canaglia Per dicci tutta la verità Chì d’ogni sorte sì le ragiò sò Ma una hè mea è l’altre nò. Multitudine d’affanni è pene Ci anu fattu tantu suspirà Obligati à piglià ciò chì vene Senza sapè mai cume fà Ognunu porta la so cundanna È ùn la pò mancu barattà Chì d’ogni sorte sì le pene sò Ma una hè mea è l’altre nò. TI NE SÌ ANDATU Ti ne sì andatu Per issu locu stranu È ci ai lasciatu. Pare chì da culandi S’hè piantatu u tempu Sò firmati l’anni. Pare chì u sole Mai n’ùn si vede Nè mancu la luna. Pare ch’ùn si sente Nè fretu nè callu Ùn ci hè mancu ventu. Pare chì un cantu Di voce stinzata Si sente luntanu. Pare ch’in’ssu locu Chì nega l’umanu Ùn ci hè veritai. È purtantu o babbu Quantu l’omu noi L’avemu circatu. Ma perchè Per issu locu stranu Ti ne sì andatu È mi ai lasciatu. TORNAMI A puesia si n’hè andata Cum’è una mamma abbandunata È tandu ghjunsenu li fochi È scuppittavanu sti lochi Sfiacculava ogni muntagna È ughjulava la campagna Ne brusgiava ancu la terra Tramezu à tamanta guerra. Oghje ne corre a risa scema U scaccanime di la morte Ma ditemi ciò chì ci ferma Per pudè cambià la sorte Mi sentu avà cum’è cutratu Qualcosa in mè si n’hè strappatu Avà po sì chì ghjè l’inguernu È ferà fretu à beternu. Un gran silenziu goccia à goccia Si empie tuttu u mondu interu Eo cercu à sente una voce O almenu puru un penseru Ma nimu più ùn mi risponde Sò scunsulatu per ste sponde Solu u sole ùn si vole tace Tramezu à tamanta pace. Guerra è la pace sò u mondu È l’addisperu hè senza fondu Tutti li più belli mumenti Facenu piazza à li turmenti Un grande amore tù mi desti È po per mortu mi lascesti Ma dea o strega chè tù sia Tornami torna o puesia. L’AMANTI MALADETTI Per la manu à listessu passu Fughjendu u paese accanitu In la filetta si sò chjinati In quella machja ultima casa U core à strappà lu pettu È l’ochji pieni di lume crosciu Ma ci hè un locu in muntagna Chì mancu d’estate ùn vole siccà. U ghjornu avia figliulatu Di a so notte à più nera Ancu lu tonu ci si era messu Cum’è à vulelli cundannà E campane di u scandalu Si sò tutte messe à sunà Ma ci hè un locu in muntagna Chì mancu d’estate ùn vole siccà. Sunate puru campane inferne L’amore ùn hè da criticà E vostre voci à noi sò mute Ùn le vulemu ascultà Nunda quì ci pò mantene E pieni ùn si ponu parà Ma ci hè un locu in muntagna Chì mancu d’estate ùn vole siccà. Da poi ùn sò mai più ghjunti Pare ch’elli sò sempre in machja Amutuliti i paisani Ùn anu più nimu à sprezzà Da l’amanti maladetti Nimuùn ne vole più parlà Ma ci hè un locu in muntagna Chì mancu d’estate ùn vole siccà. O ONDA O onda quand’è tù sorti tù Di le furie antiche ingullite Ne ai tutta la storia. O onda o lu toiu lu silenziu Prufondu più ch’è la tomba Biancu cum’è a stilettata. O onda quand’è tù canti tù Hè un voceru chì sbuccia Cum’è schjatta a fucilata. Tanti battelli persi Tante terre à truvà Tanti porti annigati Tant’amori à inventà. O onda liscia, liscia, liscia Linda, linda. ANNIVERSARIU DI MINETTA Per tutti l’anni chì sò scorsi Per le to gioie è le to pene, Per li fatti è li discorsi Per lu sangue di le to vene. È … per la to memoria cara Chì luce sempre in core à mè Vogliu gode ogni stonda permessa Vogliu godela per tè. Per quelli chì à tè sò cari I to figlioli ,la to ghjente Per lu to granu ,i to filari Per lu core è per la mente. Per li to ochji à la funtana U to amore immensità, A cara santa nostra mamma Per l’oghje è per l’eternità. Tù sì la mio surella cara Quella ch’hè nata à tempu à mè È sì di mè stessi luntana Seraghju sempre accantu à tè. |