| À L’ACQUA DI LE TO LACRIME À l’acqua di le to lacrime Aghju betu una matina L’amarezza di lu to pientu S’hè ficcata in la mio vita. Zitellucciu natu appena À lu ventu di lu dulore Per cresce in li malanni Di sta terra di sudore. T’hè vulsutu à travaglià È cunnosce lu patrone Pè capì chì le catene Ùn so tutti di prigione. Per fà cresce lu prufittu D’una logica straniera À lu t’amore nigatu È à l’umanu penseru. Ùn ai capitu nunda Ciò ch’ellu hè u putere Ùn hè po esiste bonu Quale sia la manera. Avà mori sott’un sole Ch’ùn hè per tutti uguale Oghje sai chì le catene Ùn sò tutte materiale. Zitellucciu natu appena À lu ventu di u dulore Per cresce in li malanni Di sta terra di sudore. A LETTERA Dumenica vestutu da dumenica Ziu Martinu passa ste girate di dumenica. Stupide di polvere è di silenziu trascaldatu À ste girate d’abbacinu da duv’ellu si vede À longa cità muta distesa à fior’di mare. L’averanu avutu quallà, Sta lettera. Nantu a traversa viota, un arabu passeghja, È vede un antru arabu ind’è vitrine bughje di l’invernu Chì u vede. Ùn sà mancu chì fà i caghji di i so mani S’ella sapessi scrive Sta lettera, sta lettera, sta lettera. ACELLU LUME Acellu lume Corre u fiume. Acellu girivecula Face u fretu Acellu girivecula Chì spiculeghji In a me mente Indiferente ? Acellu carofanu Senza amore Ti ne fali Ti ne mori. Acellu cavallu Face u caldu Acellu girasole Chì sole volti In i me sogni Senza bisogni ? Acellu valsu Amore falsu. CANTATI Cantati da cantà L’universu chì mi circonda Quandu a mente ci s’affonda Di l’esse in la to immensità. Cantati da purtà I to figlioli in lu bughjone Quandu cercanu à l’appasponi Senza pudessi induvinà. Cantati da lentà A to carne ch’hè prigiunera Quand’ella mughja a mazzera A dura sorte di l’andà. Cantati da brusgià U fogliu neru chì cundanna Quandu a cuscenza si spanna In cerca di lu so luttà. Cantati da cantà A mossa di la to credenza Quand’ella casca una sintenza Di sangue per arricurdà. CULORE DI MAGHJU Induve sò tutti li fiori ch’imbellìscenu maghju Nant’à i muri di e prigione ch’ùn hanu più culori. Quandu l’ochji di u male in la perfida notte Scòntranu un antru sguardu chì prestu s’avvicina. Quandu à l’orlu di u pientu l’ombra miraculosa Ànima eri ribella t’arreca lu so amore. Quandu a to voce unita chjama à dì la di u veru E mani di a ragione per spellà quella bestia. Induve sò tutti li fiori ch’imbellìscenu maghju Questu ùn era toiu è ti vole tumbà. Quandu l’omi mughjeranu à l’arechje di u tempu Mez’à tutti i fumi neri mandati à l’infernu. Quandu a mossa universale sanguinosa è schernita Alzerà centu bandere in brama di paradisu. Tandu i fiori nasceranu assuvati da u dulore Pè datti un antru maghju di centu mila culori. CUSTRUÌ Custruì un castellu di luce Cù di petra li fundamenti Ch’ellu ne sia lu murattore U figliolu di li venti Ch’elli ci sumeni fiori Prufumi dolci è viulenti. Custruì un nidu per tutti Cù ghjenti di mille culori Mille gusti è le so lingue È pò dolci li rimori Ch’elli cantinu li silenzii È pò battinu li cori. Custruì una casa cumuna Cù le rise di li zitelli Da fà ghjucà ancu li vechji È l’acqua di li rielli Cù la so dolce canzone È li canti per purtelli. L’IDEA VERA A nostra storia, à e mente murate Arrampiccata svegli a memoria Cum’è a candella frusta hè un ghjornu Sbacca a petra. L’idea vera, à chì ùn vole crede Apri lu vede dia la fede Cum’è in le fole l’inghjuliati Vincenu i maghi. A nostra voce à e lingue annudatu Affacendata dia lu sfocu Di quellu fiume, lama di lume Sboccu di e piene. L’idea vera, à chì ùn vole crede Apri lu vede dia la fede Cum’è in le fole l’inghjuliati Vincenu i maghi. E nostre mane à e porte serrate Appiccicata abbimu a forza Di quelle mane chì di e suvare Strappanu a scorsa. L’idea vera, à chì ùn vole crede Apri lu vede dia la fede Cum’è in le fole l’inghjuliati Vincenu i maghi. MARCHJAVA L’omu marchjava tristu è penserosu È l’acqua lu bagnava pianu pianu Dece anni à oghje avia fattu sposu Ma ella ripusava in terra luntana. A so vita era biota è strascinata Un ghjornu mandatu quì, l’altru culà Più nisun piacè più nisun scappata Tantu in tantu un amore falzu per ballà. In lu foscu di lu celu ammantatu U lume bruttu dicia falzità Senza riflette si seria lampatu Per ùn più sente u so core lagnà. Ma a scontru quell’eternu Quellu sole mai spentu Custì in core d’inguernu S’hè siccatu lu so pientu. Avà marchja sottu a luna Pè la grande piaghja bianca Dizzingatu hà le so fune Vogliu vince cun tè à fiancu… MINE Mine, mine Sò traculinu, È vende mine Mine di mi ne vò, Mine di mi ne vengu, È da ch’o mi ne invengu, Vendu mine è mi ne vantu. Questa hè mina di mare bruttu, Carcu di scaramizzuli, Di mullizzu è d’esili frizzuli. Mine, mine Sò traculinu, È vende mine Mine di mi ne vò, Mine di mi ne vengu, È da ch’o mi ne invengu, Vendu mine è mi ne vantu. Questa hè mina di celu bruttu, Pè nuli di panni gonfii, Sopr’à campanili pizii è muti. Mine, mine Sò traculinu, È vende mine Mine di mi ne vò, Mine di mi ne vengu, È da ch’o mi ne invengu, Vendu mine è mi ne vantu. Questa hè mina di senteze purpurine, Ch’intrenanu è assufucanu. Mine, mine Sò traculinu, È vende mine Mine di mi ne vò, Mine di mi ne vengu, È da ch’o mi ne invengu, Vendu mine è mi ne vantu. Questa hè mina di rimbeccu Pè una tacca umbrosa, Nant’à e nostre pagine bianche. Mine, mine Sò traculinu, È vende mine Mine di mi ne vò, Mine di mi ne vengu, È da ch’o mi ne invengu, Vendu mine è mi ne vantu. POPULU VIVU Lintatu da li monti Cum’è un falamentu Si hè spartu lu cantu Brioni verità. Populu vivu, Populu corsu, Canta la lotta d’indipendenza. Purtatu da li venti In Francia assassina Stendi la so chjama Quella di a libertà. Populu vivu, Populu corsu, Canta la lotta d’indipendenza. Soffiu di a timpesta Chì sciappa i cantoni In paese stranieri Ghjustra la bandera. Populu vivu, Populu corsu, Canta la lotta d’indipendenza. Scioglii la catena Liberu devi esse Ricusa lu francese Chì s’impatrunisce. Populu vivu, Populu corsu, Canta la lotta d’indipendenza. QUAND’ELLA AFFACCA LA NEVE Quand’ella affacca la neve in core di u nostru sognu Per accende u fucone di focu ùn c’hè bisognu Chì la mente si disceta in faccia di lu dimoniu. U dimoniu universale chì livella a vechja terra À prò di qualchì putenti puru aduprendu la guerra A miseria è l’opressione à nome di ghjustizia vera. Maladetti i custruttori di e centrale di la morte Da impacichi in lu mondu scusa di cambià la sorte Di e so nucciul’è sumente n’avemu à fà la raccolte. U vulemu esse pari di l’omi civillizati Senza core è fatti à cerbelli affattughjati Senza nè sogni nè brame fora d’esse ben tichjati. A tichjina velenosa empie corpu è tomba mente Chì impedisce di vede è po rende ubbidiente À la forza chì ghjastema rede senza fami senti. Omi liberi seremu n’emu fattu ghjuramentu In faccia à li nostri monti battuti da l’acqu’è ventu Di rigiru muveremu à campà d’u nostru stentu. RONDA A notte core per la muntagna Eu dinò cari cumpà Ci si trova castelli in Spagna Per sunnià. Ronda la ronda di le muntagne Sò tanti fiori da sbuccià Corri corri corri ventu A sera nun vole piantà. U ventu core trà li spinzoni Eu dinò caru cumpà Cercu li versi di l’anticoni À cantighjà. Ronda la ronda di le muntagne Sò tanti fiori da sbuccià Corri corri corri ventu A sera nun vole piantà. A notte corre per la muntagna Eu dinò caru cumpà Apressu à l’omu chì si lagna Senza piantà. Ronda la ronda di le muntagne Sò tanti fiori da sbuccià Corri corri corri ventu A sera nun vole piantà. U ventu pienghje per la muntagna Mi sò piantatu caru cumpà Nù le so lacrime si bagna L’eternità. Ronda la ronda di le muntagne… Sò tanti fiori da sbuccià Corri corri corri ventu A sera nun vole piantà. SÒ GHJUNTU Sò ghjuntu à l’abbughjata Quandu a suppa scaldava à u focu Di l’accolta perpetuata Di l’omi nati in lu so locu. Sò ghjuntu à u fà di u ghjornu Quand’è vo durmiate sempre A luce bianca vugava intornu À la casa è à lu focu. Sò ghjuntu la borsa in manu Piena di povere cose da dà Legna d’auturnu frutti di veranu È tante vechje canzone di e stagione chì vanu. Aghju pichjatu una volta Sola m’avete rispotu U pane dipoi sott’à la volta Di lu fornu canta la nostra accolta. SOLA U to spinu Face attu È ti ghjimbi ? Ma chì cerchi ? A to manu Face attu Mancu u lume Ùn ti vede. A to faccia Face attu Mancu u spechju Ùn ti vede. U to piantu Face attu Mancu l’aria Ùn ti sente. U to spinnu Face arcu È ti ghjimbi ? Da chì pienghji ? |
