 Oghji più che mai |
| L’ARBURUCHJU Aviamu piantatu un arburuchju Faci ghjà più di trenta anni avà I prima tempa, hà straziatu un pucuchju Po s’hè ripresu è pudutu campà In l’annati currindu l’arburuchju Cresciva, è si pudia rimarcà Issa tarra facia prò, à u so suchju A so billezza era à mintuvà Ungni annu, l’arburonu hà datu frutta À a ceca ùn si facia chè strappà A so sumenti ùn pudia essa chè muta Ch’ungnunu, u si volsi appruprià Cussì ch’in piena forza, l’arburuchju Chì era duvintatu una fiertà Cascò malatu à perdani u suchju I so branchi sò ghjunti à cascà Un ghjornu a timpesta fù più bruta Chì l’arburi pungnendu di luttà Si resi è po a so vita fù sdrutta Ma lasciò naciola pà radicà Hè natu, curciu è solu, un arburuchju Mezu à muchja è tanca mali ni stà Pò metta qualchì annu à dà ci fruttu Ma ci vularà prestu di nittà Pò metta qualchì annu à dàci fruttu Po incù misura, sparta è suminà. OGHJI Amicu fà ricusu Un ti lacà andà Tu un voli perda l’usu Di a biata dignità, a biata dignità Amicu fà ricusu A cio chi ssà sbaglià Pà un essa richjusu Un ceda, un dubità. Oghji incù i so putera Pribiscini u mari Stallani i fruntieri Pà quiddi chi lli pari, E u corsu chi cheri Pà tena, i loca cari Risica di spariscia O forsa d’essa a paru, Sappia chi a noscia tarra He a to prupietà Micca sola a cappara Di u venda e u cumprà Oghji di più che mai Ci tocca a medità Pà un firmà di suttu E un pude pattancià O corsu sighi fermu Pà u rispettu un trimà Quandi u ghjustu premi Libara a vulintà, a vulintà Un creda d’essa solu A un vulè acquistà Sappia chi a ungni bolu U peghju hè d’un pruvà, Tù ùn voli piu cunceda Ci voli à libarà A raghjoni chi spera Ch’un voli più aspittà Tarra corsa pà tutti Casa fraternità Un po essa ridutta A venda è a cumprà A chi voli pruvittà. SCIALBU È FULENA Si fessi l’ora più calma Ch’iddi chetini rimora Quì ci hè calcosa chì chjama Forsa Hè calcosa chì mori … Fighjola a teppa vicina Senza più machja nè più mura Un hè che tarra firita Sin’à u scoddu mucatura Ani cacciatu i fiora Ani spiantatu u lucali E po dumani à l’albori Sarà sbucciatu un casali Sarà scialbatu u cuntornu Chì t’hà cunnisciutu ziteddu Si vendini casi è turri À prezzu d’oru u chjuseddu Si compra u raghju di soli U spechju chjaru llu mari A tarra si ni scunsola Li ferma chè dola amari Si compra u raghju di soli U spechju chjaru llu mari A tarra si ni scunsola Li ferma chè dola amari È sì tù ùn’a ricordu Di quandu tuttu era salvu Sappia chì li brami ingurdi Ti mettini fora scalzu … Cù l’arburi, sò cascati I noma vechji d’i cunfini Mura novi sò zuccati In’u scordu è a ruvina Induva truvarè a spica Da assicurà u to avvena Sì a radica hè sparita In u scialbu è a fulena ? Si compra u scialu è a rena U cantu di a cicala Tu, omu chì ti ni veni Passà quì sarà nigatu Si fessi l’ora più calma Ch’iddi chetini rimora Ci hè a to tarra chì chjama Un po piu laca la mora … UNA CASA Una casa piena è candiddighja u tempu ingurdu chì sà c’un ghjornu o l’altru un ghjornu latru a ghjenti si purtarà Una casa chì s’arrampichighja à tempi c’ùn poni dà cù mischinezza è strapazzi di ritorni è d’andà Senti u lagnu chì và Semu qui, no stemu qui…… In a casa vechja u ritrattu, qual’hè chì l’hà da spiccà ? Hè compru u locu Hè cursu u focu A tarra strazia à firmà Una casa pienghji a so famidda A sterpa ùn ci pò più stà Ci hè ghjuntu u soldu famitu di soli è di benistà Senti u moghju chì và U CASAMENTU In un casamentu abandunatu Un omu vulia fassi alloghjiu Incù a so famidda s’era stallatu Fora di a cità nantu a u poghju Mancu vulia fa palazzu Ancu di menu una cità Un n’avia micca idei pazzi Ma solu campa dignità Iddu cridia in lla ghjustzia A mimoria l’umanità A u veru sensu llu ghjudiziu Quiddu chi nimu po cumprà. Avia intesu parla di drittu Di ghjustu e di fraternità Ma issi belli paroli ditti Tregani nanzi di sbuccià Fora di leggi fù dicchjaratu Un n’avia solda pà pagà Cussi u tintu si n’he andatu U capu bassu senza luttà Qualcosa brusgia in u me cori Dapoi ssu ghjornu un po andà Sarà po essa u disonori D’un pude solu che cantà. Muralità infantimata A u derisoriu a u soldu va Un t’imbutrà di ssu beatu Un altru cantu devi intunà. E dopu i mesa passati U casamentu fù spiantatu A piazza a u pruvitu fù data Ma pocu ghjenti si so svighjati. E tu chi a risu tali un latru Di i frastorna lli sfurtunati Tu chi sta zittu tali un quattru Sappia chi i guai so impustati Quandi u puteri he maldiatu A so ghjustizia duventa urgogliu A vita di lli disgraziati Vali menu che un portafogliu. I DIFENDU I difendu I populi d’in altrò Chì pietini a so asistenza I difendu Parchì pietu i meia L’omini d’issu mondu Chì difendini i so dritti d’omini I difendu Parchì difendu i meia I patriotti chì luttani Nantu à i monti di a libartà I difendu Parchì ci sò anc’eiu I prughjuneri d’in altrò Chì pagani di a so parsona I difendu Parchì difendu i meia I voci di sta tarra Chì nascini da u suffucà I difendu Parchì briongu anch’eiu È in i mani tesi Chì murani un mondu novu Ci hè a meia È si teni à quidd’altri Ugni passu ch’e facciu In a notti cumuna Hè un passu pà iddi U restu sò paroli. A PIANETTA Tu chi dici a piu alta voci Vule cussi be ungni locu Quandi a chjarura s’abbroca Tandu a parolla s’affoca E tandu chi voli pinsà L’omu chi voli be u so locu Un imbrutti ne altrò ne inde se Un va mancu a zingalli u focu Fendu neci in piu d’un sapè Da l’umani a pianetta Devi essa prutetta Incù amori e rispettu Devi essa casa e tu voli tetu Pà l’altri e te, devi rifletta Un ghjita piu rubaccia in mari U so corpu rendi, un’in voli piu E quandI a timpesta spara Stallu a senta sempri di piu He come un spechju a natura L’omu prestu si devi svighjà C’he dighjà tanti sflilaturi Un pudemu piu aspittà. PA UNA STRADA NOVA Pà una strada nova a mezu a i cantona I tanca e i lamaghji Pà una strada nova giusta e sincera Rinvivisciara dumani Pà una strada nova chi dumani sara Pà i nosci fiddoli Pà una strada nova duva ungnunu sara Fiddoli di a corsica Sintiti a me prighera, o giusta a me dumanda o a me pinsata Di veda a noscia tarra, essa sempri in paci, di scopra l’ortu fiuritu Da i lindumani chjari, duva solu l’idea sara, di smiza u pani Micca di tichjassi, ma piuttostu di sparta Comu pude pinsà, suttu a u celi nivulosu, si schjarisciara l’avvena Comu pude nigà, chi ssa ghjenti d’altro, un n’imparani manca’u corsu Venini pà campa qui, pa u soli e a u mari, he vincia qualchi solda, Di a noscia cultura, iddi un ‘hani a goda Ma oghji tutti insembu, pudariamu scambià cu forza e travaddu. L’idea chi a noscia tarra un siga morta e chi nunda pudaria crescia D’arristà di pinsà e imparà i ziteddi ancu a i maiori, I valori e a lingua, cussi pudaremu creda ! I BIANCHI SALINI Vurria ch’idda fussi A me canzona chieta Com’è di u pueta Quiddu lli zinni russi Quandu iddu mi dicia Chi mi pari l’altr’eri « Veni à senta una cria I nosci aspri sarreri » Furestu di lli pina E tarra di i guai Aduniti oramai A i bianchi salini Ma un fu sempri mali O Porti-vechju, sà Chi d’antichi pasciali Ni festi una cità. Rena di Pinareddu Acqua di Palumbaghja U vechju e u ziteddu Tuttugnunul’assaghja Di punta a Fautea Suvitendu u mari Da l’alti l’Uspidali A i piaghji di Chera « S’idd’he fidu e sinceri D’amicizia e di cori Mai l’umanu mori Ne mancu he prighjuneri » Cussi ch’iddu scrivia Pà ghjuventu a vena Da supr’à gioia e pena Chi a sorti li dia Furestu di lli pina E tarra di i guai Aduniti oramai A i bianchi salini Ci he l’aghjenti d’istati Com’e furmiculaghju Ma li vi cuntaraghju I me loca incantati. NOTTI E GHJORNU Quandi a u segnu d’alba Spunta u sguardu llu soli E chi a notti calda tali un anima sola Si chjina in u serenu Di u ghjornu chi fiurisci U fiatu di a me pena Tandu ni rinvivisci E tantu notti e ghjornu Pà i tarri spariti Ti circu da l’intornu A i monda infiniti Ti circu in u rispiru Di un cantu chi da voci In u ventu chi ghjira Chi salta ungni foci Ti circu in u rispiru Di u silenziu cutratu E ancu in u suspiru Di a passioni sfiatata Cridendu chi una stella Purtessi u to ritrattu Chi u ricordu succella Ma va troppu a l’appiattu S’eu fussi a furori Di a tarra chi trema Ti daristi a splindori Sina i cunfini stremi Mi daristi u serenu Di a paci ch’un cheri A pacienza chi teni Chi ricusa addisperu Ritrovu in ungni cosa Chi a natura sumina U to visu chi sposa A vita chi camina Un acquata ha fiuritu I vaddi di un disertu Cussi aghju capitu Cio chi tu m’ha uffertu Se u segnu di l’alba U sguardu di u soli U fiori di a vitalba E l’anima chi bola UNA MADONNA Induva se andata incu i to ochja di mari A cala u to sguardu a pona lacrimi amari Induva se andata pa burrulà i sicuri A vighja sina tardi e scalda i striduri Induva se andata a incenda u to surisu A frappulani l’ori e a d’arrimbà u to visu Ti ni se andata ma a to voci chi curri Mi conta issu ritardu cancella i me furii Dicini chi oghji i lacrimi d’amori So lacrimi ghjilati, frebbi senza dulori Dicini chi oghji i pienti di l’amori Sarani appaciati a i prima calori Chi a me pinsata cridissi a u to ritornu Eiu alzariu un palazzu solu pà u to sughjornu Saria asgiatu da u drintu a lli cuntorna Ancu si u piu superbu un vali una madonna Saria asgiatu da u drintu a lli cuntorna Ma un esisti superbu chi valgi una madonna. PARTENZI Viaghjadori sogu statu Quand’idda po ci vulia Diradicassi è po parta Era quissa a sola via È di porta in orizonti È di sulca in mucaturi Aghju custruitu mondi Sogu fattu à migraturi Partenzi è mondi Partenzi è stondi I me loca più luntani Ùn sò persi in verità Aghju frustu tanti i panni Par dà fiatu à u me vultà Viaghjadori di mimoria Chì u tempu inghjuvanisci Ungni lascita hè storia Ungni fattu mi parturisci È à passa di scunfini Aghju resu vera a cima È à passa di distina Oghji campu da vicinu. TU…STA MANI L’ora risona in lla to stanza Un ci voli più d’aspittà So dighjà compii lli vacanzi, e si sà Cun mesi prestu si ni và Mancu un ricordu, avali ci manca A vi pudeti imaginà Si u ramentu mai n’he stancu, sarà L’angoscia un si po amansà Tu….. sta mani, ti ni và E ci riveni in menti i stundi lli tempi fà Come quarant’anni fà, quarant’anni fà. A noscia casa pari persa Quandi discreta ti ni và In ssi tramendi universi, à circà N’un parativu u to stintà E cussi pichjia, a spicanza A l’usciu di lli nosci cora In no sunighjani spiranza e ardori Ma issà mancanza inchjoda l’ori Tu….. sta mani, ti ni và E ci riveni in menti i stundi lli tempi fà Come quarant’anni fà, quarant’anni fà No….. aspittemu u mumentu Incù a spiranza di u campà Aspittemu fedi ardenti, l’epica, di u vultà…. di u vultà TINIMUCI CARI Tinimuci cari, o cari, o cari Si senti, si senti dichjarà Da u parlà sinceri A i falsi maneri Si batti, si perdi a verità Tra bughju e chjaru Tra paru e sparu Si perdi, senza chera pietà U be senza attu veru E luci chi s’addispera E trava e micca nuvità Paroli infiuchiti Da i buci culpiti E muti , sina veru cripà Paroli di bisbigliu He in casa l’esiliu He in casa, quali u po cunsulà I sintimi smuniti L’apparenzi aduniti Silenziu, toca, fila e va Paroli cumpiacenti O chi bella sumenti Ma ceca, vinarà pà sbuccia. Quandi mimoria cedi A parola cheri E piovi, nantu a l’unestità Aiutu, aiutu, fidanza caduta Candella, ma chi po ramintà Parchi a noscia aghjenti Campessi allegramenti Cantessi, po chi u dichjarà « O cari, O cari, Tinimuci cari » O cari, un fussi vanità. ……Un fussi falsità. A SIRENA L’aria in muntagna abbracci un fiori U celi d’ispagna brusgia d’amori U mari canta he di parolla Pa una santa badda a llu soli Annantu a rena curri un violu Tu passi e veni so solu Tu passi e veni e piu, un ti possu tuca Ma in i me veni, come un suffiu ti ni sta In u me vardatu campi serena Semu liati senza catena Una sirena soli d’amori Fiori di rena badda incu l’ori Sta in i me veni scalda u me cori Canta serena pa i me furori Una sirena fatta d’amori Amori di vita soli di cori A ungni situ a postu un fiori A l’infinitu, si ricuti, ancu pa mora Quandi a to sciuma he in furia para Vigu una piuma, supra un altari Mari amicu dalli cuncertu Mai casticu, lli fussi uffertu A luna piena, pari sunia Carezza a rena,e in mari va Sognu feritu, fiuritu da u piu chjiaru amori Senza ave bitu, u dulci di u so licori Sognu scutitu, chi ciotta in cori Chi ha prefiritu canta fervori Quandi a vita ci scurdara Da l’alba antica rinasciara Cantu di gloria chi fara dino sunia Da un altra stodia una rumanza sbucciara Sara d’amori, cun po niga Sara d’amori chi cantara Una sirena sta in i me veni Canta serena pa i me furori. |