 Populu vivu |
| A LINGUA DI I MEI In core di i mei ci dorme l’allegria, Puru quandu a vita inciampa i so passi, Ci dorme tant’amore è tanta puesia, Ancu s’elli sò zitti o s’elli stanu bassu. In bocca di i mei ci stanu mille fole Da cuntami li tempi di tutte le sumiglie, Chì tessenu a leia nant’à un filu d’amore, Mentre a vita corre è strappa ogni briglia. In manu di i mei hè scritta a spartera, In lettare sulcate da e cugliere andate, Hè dettu lu travagliu è po la straziera, Per fà cresce più belle e so nove biate. In l’ochji di i mei ci vecu tante frante, Tant’amori pertuti à l’eterne credenze, Una manera d’esse, una fede tamanta, Tuttu ciò ch’hè amore è chì pare viulenza. In casa di i mei ci canta una lingua, Vechja quant’è a terra induve elli sò nati, È vulia d’amore scrive’sse duie rime, Dilli quant’è sò fieru d’avelli à lu mio latu, È vulia d’amore scrive’sse duie rime, Dilli quant’è sò fieru d’avelli à lu mio latu. CULOMBU Partianu e grande nave À vugà sopr’à lu mare Luntanu, Era u seculu di l’oru Per secula seculoru Cristianu. In lu portu si cantava E’ lu ventu scuzzulava Le fune, Era gioia è allegria In u vinu chì curria À fiume. S’imbuffavanu le vele Fatte di e forte tele Di l’avvene, Dendu brama à li zitelli Di li paesi nuvelli Da vene. Tunavanu li cannoni Da sopr’à li muraglioni È lu molu, In la vechja citadella Signuzzava ogni zitella In dolu. È le donne e più avvezze Si spartianu carezze È danari, Contr’à un sognu di speranza In l’ochji di a partanza Di i marinari. À li maghji di mezana À lu ventu è à la sulana E bandere, Chjucchittavanu cuccagna Per a regina di Spagna A più fiera. È li grandi li signori Sempre avvezzi à l’onori Di lu mondu, Fighjendu l’avventura D’un Calvese di furtuna Culombu. Furesteru di lu mare Senza tituli nè terre L’esiliatu, Lasciendu l’isula bella In l’ochji di Lisabella Innamuratu. Chì ricurderà la Storia S’ell’ùn hè fiume di gloria Passatu, M’arricordu una regina Chì in un castellu pienghjia U so innamuratu. CUSCENZA Da e ripe ventose Di le streme cunfine Duve lu mare estrosu Abbatte le so ire. Sin’à li monti interni À li sproni minacce Duve li nuli infermi Appendenu e so bracce. Hè u listessu paese Ch’accende li mio sogni A cuscenza di tè ! Hè u listessu paese Ch’accende li mio sogni A cuscenza di tè ! Da i vechjetti à spassu D’un tempu impulveritu Cum’è un ritrattu passu Più giallu chè culuritu. È da ogni zitella À l’estru ghjucarinu Chì per fà fatalella Azzinga u so pendinu. Hè u listessu paese Ch’accende li mio sogni A cuscenza di tè ! Hè u listessu paese Ch’accende li mio sogni A cuscenza di tè ! Da l’avvene piattatu D’un stracciu da straccià Chì ne asconde u pattu Ch’eu devi imaginà. Da l’avvene cumunu Ch’elli ci anu toltu S’ellu ne ferma unu U fruttu serà coltu. Hè u listessu paese Ch’accende li mio sogni A cuscenza di tè ! Hè u listessu paese Ch’accende li mio sogni A presenza di tè O Corsica È PO L’ORE Contami l’ore D’ogni furrore, Di tempu fà Di’ssi parenti, Chì si sò spenti è nimu ùn sà, Chì si sò spenti è nimu ùn sà… Parlami pianu, Di ciò ch’hè stranu, In l’omu mutu, Isse file stanche, D’abiti bianchi, chì sò vistuti, D’abiti bianchi, chì sò vistuti. Dimmi la storia, Quand’ella sfoglia, U so librone, Tutti li passi, È po li chjassi, d’una canzona, È po li chjassi, d’una canzona. Tandu li ghjorni, Di li frastorni, Di li piacè, Saranu frutti, Ch’ùn sò da tutti è sò da mè, Ch’ùn sò da tutti è sò da mè. Contami l’ore D’ogni furore, Di tempu fà Di’ssi parenti, Chì si sò spenti è nimu ùn sà, Chì si sò spenti è nimu ùn sà… L’ACQUA Sò le quattru stagioni, Chì l’anu inventata, Fendu li paragoni, S’ella hè corsa o stanciata. O acqua corri, corri, Annacquaci u visu, È lavacci lu core. Ci dà suchju di vita, È paura di morte Hè surgente di lita, Ma appacia ogni sorte. O acqua corri, corri, Annacquaci u visu, È lavacci lu core. È s’ella si ne và Centu anni o centu mesi, Si pienghje ma si sà, Volta à li so paesi. O acqua corri, corri, Annacquaci u visu, È lavacci lu core. L’ALTRU VERSU Cantà i ghjorni di sfurtuna, Di tutti li sogni scurdati, Cantà l’avvene ch’omu affuna, À l’atomu scatinatu. Cantà u soldu di i ladri, I mulini scarsi di granu, E mandrie viote di e capre, È quelli ch’ùn anu pane. Cantà u fretu di l’inguernu, Chì culpisce u disgraziatu, A to rima chì vole indernu, Sopr’à u to crede imbruttatu. Cantà i sgiò e so ricchezze À spini povari acquistate, I ghjorni senza carezze, Di i ciucci abbandunati. Cantà i letti senz’amore, E famiglie à i quattru venti, I mazzuli di fiori, Chì nascenu à mez’à i pienti. Cantà l’oddiu chì spicca ghjente, È ti lascia u core nudu, Per circà e so sumente, Nant’à e manse di u suvu. Cantà u sguardu ch’hà da vene, È chì à u toiu inturchjatu, Farà vultà in le to vene, L’amore di un tempu andatu. L’ATTU Quandu inturchjati à listesse sperenze È à listessi guai, Un pocu di mè si sarà spartu è viaghjatu, È chì un pocu di tè sarà. Quandu l’amore sarà ingrandatu, Tamanta à un pallò rossu, Cum’è un stracciu sott’à a neve. Quandu i ghjorni saranu fughjiti, È chì l’ore spiumbate Ùn ci lasceranu più tempu. Quandu a vita c’avarà imbriacatu, Più chè di ragione, È chè noi ùn saremu più. Tandu sarei tù à l’usciu di u caminu, Ti sianu parechji l’istatine, È i soli è l’inverni. È davanti à’ssi porti chè tù scuprarei, Per a prima volta, Per a prima volta. Lentà senza paura a voce sgalapata, Di l’estru canterinu, Di l’estru canterinu. L’EMILIANA Cavalcheghju pè la « pampa » Incù pistole è fucile Facciu chjuccà lu staffile, Cavalcheghju pè la « pampa ». Aghju centu cavallieri, Cù le mustacce in battaglia, Sò tutti omi di vaglia, Aghju centu cavallieri. Per la legge sò banditu, Ma la legge di li mei, Hè quella ch’o facciu eiu, Per la legge sò banditu. Quandi lu sole s’arrabbia U « sumbrero » chì mi campa, Mi face casa in la « pampa », Quandi lu sole s’arrabbia. À la festa patrunale, Dopu finita la messa, Facciu ballà le prumesse, À la festa patrunale. Annu passatu à la fiera, Cumprai una mitragliosa, Più cà lu ventu furiosu, Annu passatu à la fiera. A sera à la prima stella, Ci riscaldemu à le fiare, Femu sunà le ghitare, A sera à la prima stella. Ci fischemu la « tecchilla », Per lu restu di la notte, È « tortigliasse » sò cotte Ci fischemu la « tecchilla ». Quì finisce la canzona Cumpagneri è paisani, Di Zappatta Emilianu Quì finisce la canzona. MAGHJU Sò le rosule sanguine Chì anu intintu l’orizonte Cum’è labbre curatine Chì basgionu mare è monte. È ghjè maghju incaluritu Chì ci spaventò u core Dendu ci l’ultimu stridu Di l’inguernu chì si more. È sò le quattru stagioni Ch’anu incruciatu lu ventu Cù le saette è li toni À u legnu di turmentu. Puesia o Natura À qualessa mi cunfonde Mascherendu la figura Di l’angoscia chì m’atonde. Serà l’acqua di u celu Chì ci pienghje à la faccia È spenghjì tante candelle Tante vite à’ssa festaccia. Currendu cum’è u fiume À fà ne pienu lu stagnu A sera à l’ultimu lume Si sente cullà u lagnu. U lagnu di a nostra ghjente Chì ùn si perde in l’arburoni Ma vene à straccià la mente E’ straccià le mio canzone. Serà vera la vuciata Chì dice è ribomba in mè ne Chì sta terra marturiata Ùn averà mai bene. Pregu la Santa Regina À l’altare di stu monte Ùn sò rosule sanguigne Chì anu intintu l’orizonte. T’AVERIA T’averia vulsutu dà, Una spassighjata à lu veranu, Un ghjornu novu è l’albore, Tutte e duie in lu chjarore, Di a luce bionda ch’in mè core, Di a luce bionda ch’in mè core. T’averia vulsutu dà, Basgii marini di l’estate, Lu silenziu è l’ambata, Di li mio voglie assulanate, Mentre si scioglie di u passatu, Mentre si scioglie di u passatu. T’averia vulsutu dà, U ballu di l’auturnu, Di culori è d’oru annicatu, È lu mio capu assirenatu, À lu to solu accunsentu, À lu to solu accunsentu. T’averia vulsutu dà, Tante carezze per lu to invernu, Per mai più avè u fretu, È in una strinta di manu, Move u focu è la fame, Move u focu è la fame. T’averia vulsutu dà, Le mio parolle secrete, nu i porti di a notte, Quandu in mè ti rispundia, La to dulurosa forza, La to dulurosa forza. T’averia vulsutu dà, A sola meia certezza, È l’ultimu sonnu, Di lu mio core statu chjosu, In quella stanza di un ghjornu, In quella stanza di un ghjornu. TERRA SACRA Cantu pè la terra sacra Duve dorme la memoria Cantu pè la terra sacra Duve torna ogni gloria. Quandu ch’ell’alburighjeghja A Nazione sì rinova Cantu chì spampilluleghja L’alba di li tempi novi. Cursichella addulurata Vogliu armati mille canti Mille voci spurgulate È milli cori d’amanti. Di fiati cum’è lu ventu Per empie valle è furesta Quandu traghje mal’cuntentu Ci face pisà la testa. Testa mora à la celente Chì basgià l’eternità Mora testa d’a mo ghjente Chì offre lu so cantà. Testa mora à lu sole Chì schiaffa l’immensità Mora testa quandu bolle A forza di quellu chì sà. VOCE VENTU Senti sta voce ventu chì ti canta a puesia, Senti sta voce ventu chì t’insegna l’armunia. Ùn puderà mai, mai piantà Fine chì lu mondu girerà Ùn puderà mai, mai piantà A so manera di luttà. Cum’è l’impruvisate di sti pueti felici Chì schjariscenu u sole, sguassenu i nuli grisgi. Ùn puderà mai, mai piantà Fine chì lu mondu girerà Ùn puderà mai, mai piantà A so manera di luttà. Di l’avvene bramata feremu a nostra via Senza timore in core, senza mai ghjelusia. Ùn puderà mai, mai piantà Fine chì lu mondu girerà Ùn puderà mai, mai piantà A so manera di luttà. Senti sta voce ventu chì ti canta a puesia, Senti sta voce ventu chì t’insegna l’armunia. Ùn puderà mai, mai piantà Fine chì lu mondu girerà Ùn puderà mai, mai piantà A so manera di luttà. |