 Stonde, stonde |
| A Tanaglia (A Niculau Quilici) Vedi, Ci so li ghjorni Scritti à u focu Di a pena Chi sumena In ogni locu Di vita I so forni. A fronda scema infredulita In core di decembre hè cascata Cume una lumera malata Da la santa fiara tradita A cunosci tù a miseria ? A crepa tempu lu dulore Cume una strega di rapina Corre u mio sognu in ruina E s’intana in lu mio core A cunosci tù a miseria ? ln u paese marturiatu Carchi d ‘angoscia. agghjumellati Ci correnu tanti sullati Di l’universu disgraziatu A cunoscu eo a miseria. Di te È mi ferma di tè, un surrisu secretu Chì cerca in lu mio pettu, l’ardente zitellina. È mi ferma di tè, a chjoma luminosa Di una stella ascosa, cascata in la matina. È chì vene à l’incontru di a mio vita. È mi ferma di tè, cume un ricordu santu Chì cerca lu so cantu, in la tomba smaritu. È mi ferma di tè, u ventu chì s’intesta À spuglià la furesta, à l’auturnu finitu. È chì vene à l’incontru di a mio vita. È mi ferma di tè, u fiume maestosu Chì fala furiosu, à l’assaltu di e piane. È mi ferma di tè, quella dolce carezza Chì scacciava a tristezza, di ogni lindumane. È chì vene à l’incontru di a mio vita. È mi ferma di tè, quella làcrima amara Di una zitella cara, chì cerca un destinu. È mi ferma di tè, quella ferita vechja Chì ogni tantu si spechja, nantu à lu mio caminu. È chì vene à ripiglià la mio vita. Cantu per un omu liberu A l’ultime biade C’hè passata un’ombra Chi cercava à tè Nantu a e rosse strade A lume d’oriente Ci pienghje la ghjente Sarà mortu un rè ? In le case spente C’hè passata un’ombra Chi cercava à tè Nantu à un muru ardente S’hè persa una fola Nimu ùn si cunsola Sarà mortu un rè ? In borgu luntanu C’hè passata un’ombra Chi cercava à tè lnd’un tempiu stranu Una l uce trema Ci strida una scema Sarà mortu un rè ? A l’orlu d’un fiume C’hè passata un’ombra Chi cercava à tè Nantu à e bianche sciume Ci corre un battellu ln cerca d’anellu Sarà mortu un rè ? Eo ùn so che di tè Omu liberu Eo, un so che di tè Da u ghjornu di a ferita Fin à la notte infinita Seguitava l’ombra chi cercava à tè Seguitava l’ombra chi cerca va à tè. A canzona di u viaghju Ti portu per la manu in lu mio mondu Quellu di la bianca alta muntagna Da l’Alcudina fiera à lu Ritondu Induve ci stà lu falcu cù l’altagna. Ti portu à sente cantà la furesta Imbalsamata è pura quand’hè l’ora Quandu l’acellu à u nidu salta in festa È chì lu mio muvrone s’innamora. Ùn ai mai vistu in locu iste zitelle Chì vanu à l’attrachjata à la funtana Tenendu forte in capu le tinelle È chì sona la sera à la campana. Ti portu à sente batte la rustaghja Chì canta in ogni chjassu à lu veranu Ti portu à vede luce u tribbiu in l’aghja Chì chjama ogni famiglia à piglià granu. Ti portu à vede l’omu in la campagna Chì pone la so piola in ogni locu Mentre la neve copre la muntagna È chì in ogni casale canta u focu. Mi piace à sente cantà ista canzona Chì parla di a rivolta di l’umanu È canta cusì forte chì risona Disceta la speranza in la mio manu. Pretatus balaninus In manu u libru santu è in bocca la saetta Di u diavule hà u core è di Christu la baretta Alleluia Prima ellu t’alleculeghjia cun manere graziose Ma quand’ellu hè bellu tecchju piglia e teppe vanitose Alleluia S’ellu sente cantà corsu hè pronta la so sintenza Fà ch’ellu ùn si vega in ghjesgia di u populu a sperenza Alleluia Quand’ellu affaca un ministru tandu si diventa fieru Pocu impremenu l’idee in stacca hè lu so penseru Alleluia Quale chi sà un bel ghjornu diventerà tulerente Farà e so cuntrizzione stu sumere penitente Amen. U divurziatu Venuta hè l’ora di a porta chjosa Di l’angoscia mia finita C’hè qualchi lacrima furiosa Chi à la notte si marita È una sperenza ghjelosa Chi stringhe una ombra smarita. Riturnellu È ti voltanu e stonde Di u cumunu chi s »hè scioltu Da core dolce à core crudu Da u lettu nidu à u lettu nudu lnduve si cunsuma una vita. Da core pienu à core mortu Da u lettu casa à u lettu viotu Induve si cunsuma una vita. È d »esse solu u spavecchju Pianu s’intreccia à e to pene Trascini davanti à u specchju A to carne senza vene Chi a paura d’esse già vecchju Di tantu in tantu ti vene. Di u ghjornu u più fatale Stai aspettendu u dispacciu Per ghjunghje in tribunale A pruvà l »ultimu abbracciu Chi di disfatta finale Ti sarà un antru lacciu. Canzona vagabonda Una fata peregrina s’hè calata in lu mio core Ella guida la mio strada con furtuna è cun amore Corre corre all’infinita u ventu di la mio vita Corre corre all’infinita u ventu di la mio vita Cum’è pane d’ogni ghjornu aghju una sporta di stelle Per a luna è per u sole scrivu le mio riturnelle Corre corre all’infinita u ventu di la mio vita Corre corre all’infinita u ventu di la mio vita Quandu d’inguernu la neve mi trova per iss’alte cime Cercu sempre qualch’agrottu per finisce le mio rime Corre corre all’infinita u ventu di la mio vita Corre corre all’infinita u ventu di la mio vita Cum’è sposa aghju una musa, cum’è lettu aghju la terra E le mio sole cunfine sò la muntagna e la serra Canta canta all’infinita u ventu di la mio vita Corre corre all’infinita u ventu di la mio vita L’affissu Guarda fratellu A vigna luminosa Trisineghja di vita A l’orizonte acesu Cume un solcu d’argentu Chi una manu marita A un’viaghju apesu A un’viaghju apesu. Cusi bella terra duve dumane (eo) mi ne vo. Cusi bella terra Duve dumane (eo) mi ne vo. Guarda fratellu D’un paisanu mutu S’arrichisce u suore Di e cugliere cumune S’infrebba l’operaiu Per un cantu amore Da rompe centu fune Da rompe centu fune. Cusi bella terra Duve dumane (eo) mi ne vo. Guarda fratellu Nant’à un’erba fiurita S’accampa u to destinu Per fighjà l’eternu E m’incanta di gioia Un sguardu zitellinu Postu nant’a un’quaternu Postu nant’a un’quaternu. Cusi bella terra Duve dumane (eo) mi ne vo. Guarda fratellu A l’alba di a to notte E teneru l’affisu Che t’un peccia u muru Scrittu à l’inchjostru rossu A strughje quell’affissu D’un tempu tropu duru D’un tempu tropu duru. Cusi bella terra Duve dumane (eo) mi ne vo. A u ventu di l’anima (A Michela Lenck) Dimi induve tu viaghji tù È cume si chjama a to funtana Hè cusi chjara l’onda chi corre quassù Sopra a miseria umana Dimi induve tù viaghji tù. Dimi induve tu canti tù È cume si chjama u to locu Hè cusi bellu u pratu verdicente quassù Sopra l’ardente focu Dimi induve tù canti tù. Dimi induve tù pienghji tù È cume si chjama a to tristezza Hè cusi dolce a u lume chi splende quassù Sopra tant’amarezza Dimi induve tù pienghji tù. Dimi induve tù mori tù È cume si chjama a to sperenza Hè cusi folta l’erba chi cresce quassù Sopra a falsa credenza Dimi induve tù mori tù. Eo, eo viaghju da cantà da u pienghje à u more E ùn so di a miseria che l’alburu chjinatu Sottu au ventu d’inguernu chi rughje in lu mio core È trascina in la notte u mio sognu malatu. U vecchju maestru Aghju in core quellu nodu a farfalla E u libecciu di a mio giuventù Aghju in l’occhji una barca chi balla E appena di musica in più Aghju in core mille è mille canzone Chi purtavanu i mio passi in l’insù Aghju in l’occhji è porte di u macchjone E appena di musica in più Aghju in core un odore d’Aprile Cume fonte d’ardente virtù Aghju in l’occhji un lume veranile È appena di musica in più Aghju in core u mio vecchju maestru E una ghitara chi canta dinù Aghju in l’occhji Bastia, è un bel’estru E appena di musica in più |