 Una tarra ci hè |
| À L’ACULA DI CINTU U Cintu hè lu to core È ne conti le to strade Sò petre accumpulate Poste pè ch’omu capisca Quant’elle sò belle l’ore. Niolu hè la to mente Fiurita à paisoli Quanti vechji si sò soli À l’entre di a so notte Ma, tù ci sì cù la to ghjente. U tempu s’hè firmatu In e sepe à rifiatassi È sò corie, è sò bassi À infierì li to detti D’omu acula beatu. Vidarei u nostru ghjornu Ùn pò esse ciò ch’omu crede Una casa senza fede Turneranu e friture È sarà caldu ogni fornu. À quelli chì una sera Ind’è tè fecenu cena Li ai datu una penna Pè ammintà la to storia L’amore di’ssa terra. A MUNTAGNERA Ch’ellu si n’hè scorsu maghju Sarà più d’una simana Approntati, o capraghju ! À lascià piaghja è calmana Ch’ai da fà l’altu viaghju Dopu ghjuntu in Barghjiana. Avvedeci, o Falasorma ! Cù i parenti è l’amichi Sempre liati à Niolu Per e gioie è i castichi, Da Montestremu à u mare Avemu listessi antichi. Sbuccarè in Caprunale Guardendu da altu à bassu Supranendune à O’mità È a funtana di u Tassu Basgiati a croce nova Chì a vechja ùn s’hè più trova. U terzu ghjornu à la mane Ti n’andarè vulinteri In Sesta o Petra Pinzuta, Biccarellu o à Tileri: Più chè mai ghjunghjaranu À l’abbordu di i frusteri. Avà chì ai righjuntu Di l’estate u rughjone Di tantu in tantu in paese Affaccati à l’occasione Poi ùn manca la to festa A mane di Sant’Antone, Poi ùn manca la to festa A mane di Sant’Antone. DA GRANDE Sappia oghje quale sò È ciò ch’o saraghju grande Saraghju cum’è babbò Rè di le muntagne bianche. Un campagnolu curtese Cù la mio mamma natura Un pasturellu di paese Passi d’elpe è di pianura. Vogliu avè mill’animali Pecure, capre è vaccine Senza calle nè stazzali Senza rete nè cunfine. Solu avè un barraccone Grande guasi cum’è un mondu Pè nasconde à la stagione E mio bestie tutte in tondu. Cum’è amiche, altagne è volpe Cum’è manghjà, frutta è acqua Cum’è tettu stelle è sole Ch’in l’erba l’aria si stracqua. È dinù per l’istatina Fà mi tante mirendelle Pè le valle è le culline Cù millaie di zitelli. È poi l’ai ben’capita Chì vinarai incù mè È inseme in la vita Ne seremu regina è rè. È PURU SIMU QUÌ Timpeste d’Oriente È straziata ghjente È puru simu quì… Genuvesi i cummerci È mattane di tempi guerci È puru simu quì… Crucetta assuffucata È brama crucifissata È puru simu quì… Francisata feroce È populi senza voce È puru simu quì… Quattordeci ùn li dicia Tant’anni di caristia È puru simu quì… Partenze è spalluzzere È sole ch’ùn dà più spere È puru simu quì… Cità di u San Rimore Ruchjate senza pastore È puru simu quì… À e lenze di l’abbandonu A macchja chere pardonu È puru simu quì ! EO SAI Eo sai saraghju quì Pè chì memoria toia Abbia sempre una lenza da annacquà Un sole da ragighjà. Eo sai saraghju quì À parà ti lu tempu Chì hà da zuccà e fronte À porghje ti à e volte e mio riviglie tonte. À sente ti centu hè più cose dì Eo sai saraghju quì. Eo sai saraghju quì Ad’apprupinquà i ghjorni Pè chì u viaghju Ùn si fia in un travintaghju. Eo sai saraghju quì Quandu strughje l’ultima neve È chì Golu fattu si n’hè zergosu Da l’anni sbrembatu ma silenziosu. À sente ti centu hè più cose dì Eo sai saraghju quì. FIURE Un vascellu tontu È un marosulu mossu Cum’è tela slibrata À un sguardu chì conta U stampu di una smossa. Ed eiu à mezi à quessi Urfagnu di memoria Calpighjatu in l’andà Di li ghjorni prumessi Mare di l’anticoriu. Un cunvugliu umanu Persu in lu so rambusciu Mez’à e cose finite Mez’à e bughje vite Passu d’ultimu usciu. È u tempu s’hè ammansatu Addossu à i mio passi Cum’è a neve in foce Quandu mancu una voce Più nun vole sgabbiassi. Un vascellu tondu Marosulu di miseria Imagina d’un alba Mentre a mio carne calda Nun ghjetta chè materia. L’OMBRA MURTULAGHJU D’asprura s’hè fattu lu raghju Di a tarra hè biancu lu sulaghju L’ore si sò triste è pisive Un ombra corre trà e campive. Cutteghja l’anima svanita Si lenta à suspira a vita, Sbuleca macchja è sipalaghju Vene à chjamà u so fuculaghju. Nascenu ughjulu è abbaghju In e chjose negre pagne Ruspa è rumena e campagne Si insanguineghja lu caghju. A notte stende lu so imperu Sgotta à bughjoni l’ultimu seru Fala u vadu fuma u pagliaghju È l’ombra scompie lu so viaghju. Cantanu in celu e più pietose Cantanu in pienti, voce angusciose Di u ventu s’apre u cataraghju À u passu di u murtulaghju… MALANNI Disuccupatu sò pè la campagna È mi ne vò pè i so chjassi solu Fighjendune’ssi lochi di cuccagna È aspettendu a notte in paisolu. I mio pinseri sò à l’ammarezza À l’avvacinu, à la malincunia È mi stantu à cunservà la saviezza Chì più d’una volta si n’anderia. Disuccupatu sò pè la citane È mi ne vò pè i carrughji solu Fighjendune e vitrine à robe vane È aspittendu di l’ore lu scolu. I mio pinseri sò à l’ammarezza À l’avvacinu, à la malincunia È mi stantu à cunservà la saviezza Chì più d’una volta si n’anderia. Disuccupatu sò ma chì vulite ? Travaglierebbe anch’eiu s’eiu pudia À mè ùn mi circate tante lite Ch’ùn m’arricordu più di ciò chè l’allegria. I mio pinseri sò à l’ammarezza À l’avvacinu, à la malincunia È mi stantu à cunservà la saviezza Chì più d’una volta si n’anderia. SÒ L’OMU Sò l’omu, Quellu di i ghjorni senza ragioni Di e notte senza lucenda Di a calmana tremenda È di u fretu senza fuconi. Sò l’omu, Invichjatu in un cantu Di tè innamuratu forse Chì faci cù lu mio percorsu Veculu è Campusantu. Sò l’omu, Fruttu di un paese D’una radica nudosa È a mio stella hè ascosa Sott’à lu to bilese. Sò l’omu, D’una storia à mai scritta D’un oceanu verde Di ciò chì più nun si perde D’una brama ch’ùn s’azzitta. U LAMENTU DI MARIA O sianu li mè ochji à manu di Diu maiò Vinuta à a fronte toia da ambata di vita, Lu mè dilettu dolce, la mè carne ferita. Sia di ricordu sempre u locu duve mi stò, Dund’hè corsu u to sangue in la sera tradita À pede di a to croce l’umanità in cruccò. Lu to arsente sguardu chì di u sole fù branu, Eiu l’aspittaraghju per u so vultà gluriosu, Incù’ssu passu lebbiu’ssu visu mai rosu, Aspittaraghju à tè lu to dettu tercanu Suldatu di l’alte paci, figliolu cimintosu L’anghjuli appress’à tè in longu stolu vanu. Cusì negri i niuli cullandi à l’Oriente, È scuru u punente chì impanna stu mondu Ne sì nant’à una croce è tuttu ti stà di tondu Più nun hè lu to sguardu bramosu è spampillente In la so strana mossa leva una baraonda, Mentre stai cusì chetu vincitore dulente. Cum’è u celu s’hè greve è cum’è a notte hè fosca Mantu negru chì balla ind’è l’anima meia Ti gardu caru Ghjesù è a to sorte attosca Tutta l’aria chì ingira’ssa vechja terra ebreia È si ne và luntanu a chjama in a to bocca Ch’hè ventu d’amore in la tenebra reia. Di sopr’à a to fronte corsa hè una culomba È una nebbia grisgia calata hè addossu à mè. T’hà fattu lu Rumanu di sta croce una tomba, Tù chì lampavi in terra u pesu di l’ohimè Di a to carne viva ùn ferma più chè ombra Una cota chì lagna cerca sempre u perchè. O caru lu mè figliolu Diu di pelle umana Omu chì si ne more in l’attese cuncolte Vinutu à sole altu per riscattà a notte` Più nun batte stu core di cotru hè la to manu Un pocu di u to sangue nant’un farru rumanu Hè dighjà una fiumara chì trabocca a morte. Oramai mi ramentu sta notte di Betleemme Mi ramentu u to visu a to parolla nesca Le stantare di toiu chì funu tante gemme Poi ste tenebre oghje in fronte à Gerusalemme O tù chì sarè dumane quell’acqua chì rinfresca Un core in lu nivone chì brusgia quant’è l’esca. UNA TARRA C’HÈ Una tarra c’hè per voi Di lacrime d’invernu D’ore chì vanu in darnu È di luce chì piglia fine Toccu Sittembre, dolce cunfine. Una tarra c’hè per voi Di sarre impaurite Di carghji annant’à e dite Omi in tana è frastoni Quandu s’incroscanu i toni. Una tarra c’hè per voi Fragata da l’arsure Brusgiata da e cutrure Spusalizia d’eternu Trà notte è fede, è infernu. Una tarra c’hè per voi Di mare, mondu è disertu Di sfide è danni à ch’ùn hà apertu E calle di l’amicizia Una tarra c’hè… divizia ! |